Спачатку адбылася сьвяточная трапеза, асвечаная Япіскапам Беларускай Аўтакефальнай Праваслаўнай Царквы Ўладыкай Сьвятаславам. Потым пачаліся ўспаміны, выступы, афіцыйныя прывітаньні. Слова бралі былыя старшыні БАЗА А. Шукелойць, Я. Запруднік, цяперашні – В. Станкевіч, старшыня моладзевай філіі БАЗА (ЗБМА) М. Цімашэнка, прадстаўнікі аддзелаў ды гурткоў. 
Наступным пунктам праграмы быў канцэрт, у якім узялі ўдзел выступоўцы з Нью-Ёрку (трыо беларускіх жанчын), Нью-Джэрзі (С. Сокалаў-Воюш), маленькія дзеткі, а таксама запрошаныя з Беларусі адмыслова на 60-ыя ўгодкі БАЗА музыкі Тацьцяна Матафонава і Зьміцер Сідаровіч. Тацьцяна захапіла ўсіх сваім пранікнёным голасам, а бард Зьміцер сыграў некалькіх сваіх уласных песен. Таксама яны змабілізавалі прысутных на зажыгальны беларускі танец ды дуэтам сыгралі на скрыпцы і дудзе папуры з вядомых беларускіх песень. 
Сымбалічна, што на сьвяткаваньні ў Нью-Ёрку прысутнічалі музыкі непасрэдна з Беларусі. Негледзячы на тое, што БАЗА знаходзіцца ў ЗША і працуе на ўзмацненьне беларускай дыяспары тут, натуральным бенефецыянтам дзейнасці арганізацыі была, ёсць ды, спадзяемся, будзе ўласна Беларусь. І таму – Жыве Беларусь! 
Ільля Куніцкі 
-------------------------------------- 
Важныя даты ў жыцьці Беларуска-Амэрыканскага Задзіночаньня ў грамадскай, рэлігійнай, культурнай ды палітычнай дзейнасьці: 
1949 – Заснаваньне БАЗА на 325 Е 100 St у Нью-Ёрку. 1950 – Першы нумар газэты “Беларус” пабачыў сьвет у Нью-Ёрку. 1951 – Заснаваньне Згуртаваньня Беларускай Моладзі ў Амэрыцы (ЗБМА) ў Кліўлендзе. 1951-1954 – Слуханьні ў Кангрэсе, якія паспрыялі заснаваньню Радыё “Свабода”. 1952 – Першая Сустрэча Беларусаў Паўночнай Амэрыкі на Ніагары (летась прайшла 28-я чарговая Сустрэча). 1957 – Набыцьцё Беларускага Рэлігійна-Грамадскага Цэнтру з Саборам Св. Кірылы Тураўскага на 401 Atlantic Ave. у Брукліне. 1959 – Першы нумар квартальніка “Беларуская Моладзь”. - Пачатак адзначэньня Тыдня Паняволеных Народаў. - Набыцьцё магільніка ў Іст Браўнсвіку. 1960 – Пабудова царквы Жыровіцкай Божай Маці ў Кліўлендзе. 1963 – Адчынены адпачынкавы цэнтр “Belair-Miensk” у штаце Нью-Ёрк. 1964 – Набыцьцё Царквы Жыровіцкай Божай Маці ў Гайлэнд Парку. - Выступленьні ў мастацкай праграме на New York World’s Fair. 1965 – Набыцьцё аб’екту на Грамадска-Культурны Цэнтар “Полацак” каля Кліўленду. 1976-79 – Удзел у Беларускіх Днях у Garden State Arts Center у Нью-Джэрзі. 1977 – Першая кружэлка Даньчыка і яго выступы на Беласточчыне (1981) і ў БССР (1989). 1977-78 – Масавая акцыя каля ААН за Дэкалянізацыю Савецкага Саюзу. 1982 – Выступленьні ў абарону беларускага дысідэнта Міхала Кукабакі. - Абарона перад абвінавачаньнямі праграмы 60 Minutes, якая была зроблена на падставе кнігі Лофтуса “Belarus Secret”. 1989 – Першы нумар англамоўнага квартальніка “Belarusian Review”. - Выступы танцавальнага гуртка Васілёк на Беласточчыне (1989) і ў БССР (1990). 1990 – Заснаваньне Кааліцыі ў Абарону Дэмакратыі і Правоў Чалавека ў Беларусі і першыя пасылкі медыкаментаў ахвярам Чарнобылю. 1999 – Адзначэньне 50-годьдзя БАЗА ў Нью-Ёрку.